ល្បែងស៊ីសងអនាធិបតេយ្យកំពុងធ្វេីសកម្មភាពក្នុងទឹកដីក្រុងសំពៅពូនបានយ៉ាងល្អប្រសើរ
(កណ្តាល)៖ បេីតាមប្រភពបានប្រាប់អង្គភាពសារព័ត៌មានយេីងថា សង្វៀនជល់មាន់ និងយូគីមានជនជាតិវៀតណាមជាមេក្លោងកំពុងធ្វេីសកម្មភាពយ៉ាងសស្រាក់សស្រាំលេីទឹកដីក្រុង សំពៅពូន ខេត្តកណ្តាល មេក្លោងដែលគេដឹងថា ជាជនជាតិវៀតណាមបានកៀងគរជនជាតិវៀតណាម និងពលរដ្ឋខ្មែរឱ្យចូលលេងទាំងថ្ងៃទាំងយប់ហាក់ដូចជាពុំខ្លាចញញើតនឹងច្បាប់បន្តិចសោះឡើយ។
បើទោះបីមានការចុះបង្រ្កាបជាហូរហែកន្លងមកក៏ដោយនៅតែមានការលួចលេងជាប្រចាំថ្ងៃដដែល ឬមួយក៏សមត្ថកិច្ចពុំដឹងឬមេីលមិនគ្រប់ជ្រុងជ្រោយទេីបក្រុមមេក្លោងល្បែងស៊ីសងជាសង្វៀនជល់មាន់ និងយូគីនៅបន្ដធ្វេីសកម្មភាពយ៉ាងរលូនបេីតាមប្រភពបានបានប្រាប់ថា ទីតាំងបេីកល្បែងខាងលេីនេះ ស្ថិតនៅភូមិ៩ ឃុំព្រែកស្បូវ ក្រុងសំពៅពូន ខេត្តកណ្តាល ។
ប្រភពព័ត៌មានមួយទៀតបានបញ្ជាក់យ៉ាងដូច្នេះថា ទីតាំងល្បែងខាងលេីនេះអាចបេីកដំណេីរការភ្នាល់ទៅបានប្រហែលមានមន្ត្រីយោធាវរៈការពារព្រំដែនម្នាក់បានបើកដៃឱ្យជនជាតិវៀតណាមចូលមកលេងនៅទីតាំងសង្វៀនល្បែងជល់មាន់ និងយូគីខាងលើនេះ ទាំងយប់ទាំងថ្ងៃប្រកបដោយមានភាពកក់ក្តៅ គ្មានក្តីបារម្ភបន្តិចសោះឡើយ។
ប្រភពបានរំលឹកឈ្មោះមន្ត្រីយោធាវរៈការពារព្រំដែនម្នាក់នេះមកអង្គភាពសារព័ត៌មានយេីងថា មានឈ្មោះ ផន ធារិទ្ធ សព្វថ្ងៃឈរជេីងនៅក្រុងសំពៅពូន ខេត្តកណ្តាល មានតួនាទីជាមន្រ្តីយោធាវរៈការពារព្រំដែនគឺមានឥទ្ធិពល អំណាចខ្លាំងខ្លាណាស់ដែលហ៊ានបើកឱ្យជនជាតិវៀតណាមញៀនល្បែងជាច្រេីននាក់ ចូលមកលេងល្បែងជលមាន់ និងល្បែងយូគី ក្នុងភូមិសាស្ត្រក្រុងសំពៅពូន។
ប្រជាពលរដ្ឋដែលរស់នៅទីតាំងខាងលើ ដោយកេីតក្ដីបារម្ភ និងភ័យខ្លាចភូមិឃុំគ្មានសុវត្ថិភាព សូមស្នើសុំទៅដល់មន្រ្ដីជំនាញ និងអាជ្ញាធរមានសមត្ថកិច្ចពាក់ព័ន្ធ សូមមេត្តាចុះស្រាវជ្រាវ និងបង្រ្កាបទីតាំងបេីកល្បែងខាងលេីនេះឱ្យខានតែបានផងស្របតាមប្រសាសន៍ដ៍ខ្ពង់ខ្ពស់របស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដើម្បីធានា និងរក្សាបាននូវគោលនយោបាយភូមិ-ឃុំមានសុវត្ថិភាព។
